Vinnigna

foto di JD Covell

‘Na furriàta ‘i suli
e ottòviru traséva a la Muntagna.
Li munti da ssumàta
calàunu capuràli e chiùrmi
ppi vinnignàri funnàli di vigni.
A cavaddu di la mula
‘nmònucu capuccìnu
ricugghiéva parménti-parménti
binidicennu a mànica larga:

«Paci e bbeni picciòtti!
Chiù mustu a lu bagghiòlu
chiù ranni la fùura».

I pistatùri chi zzòcculi ‘ntacciàti
zzaffittiànnu strudùsi
sgricciàunu a lu sàiu
sucu sagnìgnu di racìna nìura;
risulénti ‘pparàunu l’ùtru
a la burdùra di la tina
ca svapuràva spìriti di scùmi.
Pacinziùsu ‘u mònucu svilàva:

«A Mmaculàta vi ricumpénsa!».

Ma d’annàta, ‘nveci da Madonna,
sfilàu di li bértuli di iuta
a Cristu ‘ncruci stampatu a culuri.
‘Na ràia sblinnénti
mmiddicàva li chiài a San Franciscu
ittàtu ‘nginucchiùni a li So’ pedi.
Ccu fidi a zzippiài
a lu timpàgnu di ‘na butti
intra la ispénsa di lu ”Pròtu”.

Ddu Cristu
ca ‘rristàu ‘ncatanazzàtu,
ccu li sùrci e li fulìnii,
senza priiéri e garzi canfuràti,
ancora nta la menti non si stingi,
‘nsciarméntu llippàtu a li So’ carni
di lu me’ pettu spròi vagghiàrdu
e non ci pònu rànnuli e cicrùni,
lliàna, macàri sbitucchiàtu,
li malivalìi sciarùsi di la vita.

VENDEMMIA

Una girata di sole / e ottobre entrava sull’Etna. / Dai monti dei Nebrodi / scendevano caporali e operai / per vendemmiare poderi di vigneti. / In groppa della mula / un monaco cappuccino / questuava per i palmenti / benedicendo a manica larga: // «Pace e bene giovanotti! / Più mosto al mastello / più grande l’immagine». // I pigiatori con gli zoccoli chiodati / schiacciando scherzosi / schizzavano sul saio / succo sanguigno di uva nera; / sorridenti abboccavano l’otre / alla bordura del tino / che esalava spiriti di schiume. / Paziente il monaco si avviava: // «L’Immacolata vi ricompensa!». // Ma quell’anno, invece della Madonna, / sfilò dalle bisacce di iuta / a Cristo in croce stampato a colori. / Un raggio splendente / contagiava le piaghe a San Francesco / prostrato in ginocchio ai Suoi piedi. / Con fede l’appuntai / al timpano di una botte / dentro la cantina del «Pròtu».* // Quel Cristo / che è rimasto chiuso col catenaccio, / con i topi e le ragnatele, / senza preghiere e garze canforate, / ancora nella mente non si scolora, / un tralcio attaccato alle Sue carni / dal mio petto sporge vigoroso, / e non teme grandine e cicloni, / allevia, anche senza gemme, / le angosce sciarose dell’esistenza.

Pippo Mazza