Si susìu u matinu cu ’n sbadigghiu d’amuri
ca l’acqui currevanu cch’i pisci
mentri li sicci strugghèvanu li negghi
’mpidugghiannusi l’occhi ntâ rina.
Nta ’n panareddu d’ arca e di curaddu
arripusava a to’ spisa quannu ’n ventu
di focu vinni e ci dicisti:
“parrami tunnuzzu cu na canzuna sula
chidda di l’amuri”.
E cu ddu ventu a to’ spranza currìa
p’addivintari pinnenti e cullani
rosi di maju c’a facci arrussicata
’ntra spini lastimusi…
stritti stritti abbrazzati a pampineddi d’oru.
Ma l’amuri ’un t’arrispunnìa; ci dicisti:
sugnu ccu tia; ma a pena ’un ci cuntasti
finu a quannu a luci si fici focu di duluri
nt’u portu d’a riti…
Na notti senza denti era a vucca
d’u raisi dunni a so’ vuci ccu l’unni
piniava, assicutannu u smagghiu d’autri
centu occhi attamatacati
ô lampu di l’arpiuni
e tuttu ddu sangu vippi.
Quantu sangu vippi puru lu me cori!
Ma stu cannolu apertu ’un sacciu di cu’ fussi:
miu, di lu me’ amuri
o di lu mari.
E piatuseddi ccu l’occhi nni salutamu…
“Dammi a to’ manu tunnuzzu
e ’ncuntramuni comu stamatina
quannu u jornu ntô filu
curreva di l’amuri… pirchì i pannizzi nostri
tutti l’arricugghemu
nta ’n cuteddu ca nni ’rapi u purmuni .
Mentri sempri ccu na chitarra
l’amuri nni parra
pi cuntarini la sorti ca lu ’mmernu
fa curriri a li ciuri”.
DENTRO LA MATTANZA. Il mattino si alzò con uno sbadiglio d’amore/ e le acque correvano coi pesci/ mentre le seppie scioglievano le nebbie/ impigliando i loro occhi nella sabbia.
In un paniere di alghe e di corallo/ riposava la tua spesa quando un vento/ di fuoco venne al quale sussurrasti:/ ”parlami tonnetto con una canzone sola/ quella dell’amore”.
E con quel vento la tua speranza correva/ per diventare pendenti e collane/ rose di maggio con la faccia accesa/ tra spine lamentose…/ strette strette abbracciate a foglioline d’oro.
Ma l’amore non ti rispondeva; ancora gli dicesti:/ sono con te; ma la pena non gliela raccontasti/ fino a quando la luce si fece fuoco di dolore/ nel porto della rete…
Una notte senza denti era la bocca/ del rais, dove la sua voce con le onde/ penava, allontanando l’interesse di altri/ cento occhi concentrati/ al lampo dell’arpione/ e tutto quel sangue bevve.
Quanto sangue ha bevuto pure il mio cuore!/ Ma questo rubinetto aperto non so di chi fosse:/ mio, del mio amore/ o del mare./ E miserelli con gli occhi ci siamo salutati…
“Dammi la tua mano tonnetto/ e incontriamoci come stamattina/ quando il giorno sul filo/correva dell’amore… perché i nostri panni/ tutti li abbiamo raccolti/ su quel coltello che ci apre il polmone.
Mentre sempre con una chitarra/ l’amore ci parla/ per raccontarci la sorte che l’inverno/ fa correre ai fiori”.
Salvatore Bommarito
