Ficiru paci li cani e li lupi
poviri pecuri e manzueti crasti!
Torna comu lu giru ppi la luna
a scala musicali sutta i tasti
di ’n pianoforti e i noti su’ i pruverbi:
Nt’a stu munnu di babbìu
quantu cosi sentu e viu!
Tu sarba ’a petra e arriva a so’ murata
t’abbasta ’na nnacàta di guvernu
’stati ca sia o capita di mmernu
e: Cu si lagna, cu si ’ncagna
cu si mangia la castagna …
Tu pigghia a cu è ghiè
poi dacci corda
e u passatu s’u scorda
è sempri cu è cchiù riccu di dinari
ca non mori ô spitali!
Turi d’a Rrasula
