CAMPA POESIA (*)
C’è cu simìna culuri a spagghiu
cû simìna a rringu e fa cazzicatùmmuli
teni ‘u munnu ‘nparmu ri manu
c’è cu iavi ‘a varbazza longa
longa commu ‘na nniminagghia
si nunnû sapi è ‘mminchiunazzu
c’è cu meti musica e ‘a mmanocchia
purseri ‘na iunta ri sali marinu
iancu iancu e ammursiţŗatu
e c’è cu nun purseri ‘na goccia
ri sintimentu cu nunn’ha sbagghiatu
mai ‘a notti cco jornu
cu annetta paroli nunn’è mischinu
nunn’è minnìcu ‘a fammi cco friddu
nun sapi cchi sunu
ci sunu macari liggi scritti
cco chiummu fusu
e tuttu ‘u munnu è mmacabbunnu
campa poesia campa câ scaçiuni c’è.
QUANNU ‘A LUNA È CUNŢŖARECIMA
Iù macari mi facissi ‘a cruçi
cca manu manca susènnumi rô lettu
quannu ‘a luna è cunţŗareçima
facissi pirtusi ccu ll’ugni ogni tantu
e pètiri pani macari iù mi ni issi
senza fari musiòni ddrabbànna li Sţŗònculi
Paţŗi Figghiu e Spiritu Santu
mi lassassi mmurmuriari dâ ggenti
facennu ‘u Cristu senza làusu
né cu sî tu né cu sugnu iù.
MARIA
Canta canzuni Maria e suca bbroru
di ranunchi e di favi ‘a romanella
canta senza tìmmutu e tuttu ‘u munnu
sapi ca è cuntenti
canta canzuni Maria
a ccu ncontra ci cunta ‘a soia
ri commu iva e viniva
a ccu ccià cunta tritta
e a ccu ccià cunta storta Maria
ca canta e suca bbroru
pâ rringraziari a Cristu ca ci fici
‘a testa picciula commu ê minni
e ‘i minni ‘rossi ‘rossi
commu ‘a sa testa picciula.
(*) dialetto siciliano di Sortino (SR) con venature di gallo-italico
