– ”Sintìti sintìti sintìti,
a ieri, a l’ùnnici di sira…” –
E li cristiàni
‘scutàvunu ‘mpitràti
la malanòva bbanniàta
manèddi manèddi.
Attòrnu a la trancàscia
fazzulittùni e còppuli:
li fìmmini ‘ttirrùti
ricugghèvunu li figghi,
‘ngustiàti
si ‘nchiudévunu ‘ncasa.
– « TG1 edizione straordinaria.
Un altro assassinato… » –
E li cristiani
taliàmmu ‘mpitràti;
frìscunu a morti li sireni,
‘ntra na singa di issu
senza ciàtu
quàgghiunu riìculi di sangu.
Prùvuli e chiùmmu
trapàssunu li carni
scarpiddìunu cruci
a li spichi di li strati
e li banchìni ciurìsciunu.
Ritràtti risulénti ni talìunu,
senza capacitàrini
cci ddumàmmu ‘na sfurmacèlla,
stringèmu na nnòcca di velu nìuru
a tutti li bannèri
e li isàmmu a li celi
‘nta n’annàriu longu d’aunìa.
E l’omu d’oggi
cunnannàtu a campàri
cu ‘nfìgghiu camurrìsta
cu ‘nnàutru ‘lluppiàtu,
cu ‘nfrati ca ci spàrunu
e ‘na soru buttàna…
A st’omu
ci ristàu di facci lu Carvàriu
li ‘nfanfi appìsi
‘na ghiàia a lu cori
ca non crama li peni
e tanta fèli
senza spiranza di risuscitari.
SENZA SPERANZA DI RISUSCITARE
– ” Sentite sentite sentite, / ieri, alle undici di sera…” – // E le persone / ascoltavano impietrite /la cattiva notizia bandita / vicoli vicoli. / Attorno alla grancassa / fazzolettoni e coppole: / le donne atterrite / raccoglievano i figli, / angustiate / si chiudevano in casa.// – «TG1 edizione straordinaria. / Un altro assassinato…» – // E le persone / guardiamo impietrite; / fischiano a morte le sirene, / dentro una sagoma di gesso / senza fiato / coaugulano rigagnoli di sangue. / Polveri e piombo / trapassano le carni / scalpellano croci / agli angoli delle strade / e i marciapiedi fioriscono. / Foto sorridenti ci guardano, / senza capacitarci / gli accendiamo un lumino, / stringiamo un fiocco di velo nero / a tutte le bandiere / e le alziamo ai cieli / in un rintocco lento d’agonia. // E l’uomo d’oggi / condannato a vivere / con un figlio camorrista / con un altro drogato, / con un fratello che gli sparano / e una sorella puttana… / A quest’uomo / gli è rimasto di faccia il Calvario / gli abiti (laceri) appesi / una piaga al cuore / che non lenisce le pene / e tanto fiele / senza speranza di risuscitare.
Pippo Mazza
