Al momento stai visualizzando Li pupa

Li paladìni ppinnùti a li cròcca
‘nciàmmunu l’occhi
‘nta li putii di lu me’ paisi…
Urna di mari, com’è ca non ti stanchi
‘ntra ssu ìri e véniri di scuma!
Canta lu saracìnu ‘na canzuna
e li masculìni ‘bbàllunu, si stòrciunu,
‘ncìrcunu la cuda e finìsciunu
senza ‘nchiùdiri pinnulàra;
ora la rina è argentu vivu
evi focu, evi fumu, evi lamentu.
‘Ntammurrìnu batti a Tavummìna
e ‘nàutru rispunni di la Trizza
unu chiù ‘ncùttu ‘ntròna di Ggirgènti,
‘nàutru sconza la pràia a Cifalù:
li saracìni tòrnunu a cunsigghiu.
Ahi ahi Sicilia ogni ghiòrnu
lu to’ cantu resta
‘nta rigistratùri
e lu mari e lu suli
rèstunu ‘nta na cattulìna
a culuràri ‘ntònucu iancu,
a prufumàri zàghira.
‘Rretu ‘nsipàriu russu sbampàtu
‘ntra li stradi di la cità,
‘nta li chiazzi di lu munnu
Vorlàndu, Rinàldu, Gànu di Magònza.
Brògna ca ‘llìmi iànghi d’asgrànci
spurtùsiti a lu ventu marìnu,
fa pèrdiri lu sonu a li vanèddi:
a coru ‘stu cantu di guerra,
a coru ‘stu cantu di paci,
a coru ‘sta rèbbica a li stiddi;
e quannu l’arba culùra li cannìti
dàtimi na parti puru a mia:
‘ttaccàtimi ‘sti brazza cu lu lazzu,
‘mpiccicàtimi lu scudu e la spada,
vistìtimi ccu ‘narmatùra,
datimìllu ‘ncavàddu ‘nfatàtu!
Ma la me’ parti è chidda di ‘npizzenti
ca teni li catìni ‘ntra li pusa…
Chiudìtila ‘sta porta di tiatru
ora ca lu spittàculu llistìu.
Lassàtimi chiànciri
ccu tutti li me’ pupa.

I PUPI: I paladini appesi ai ganci / affascinano gli occhi / nelle botteghe del mio paese…// Onda di mare, com’è che non ti stanchi / nell’andare e tornare di schiuma! / Canta il saraceno una canzone / e le alici saltano, si girano / piegano la coda e spirano / senza chiudere palpebra; / ora la sabbia è argento vivo / è fuoco, è fumo, è lamento. // Un tamburino batte a Taormina / e un altro risponde da Acitrezza / uno più insistente tuona da Agrigento / un altro scuote la spiaggia a Cefalù: / i saraceni tornano a consiglio. // Ahi ahi Sicilia, ogni giorno / il tuo canto resta / nel registratore / e il mare e il sole / rimangono in una cartolina / a colorare intonaci bianchi, / a profumare zagare. // Dietro un sipario rosso acceso / dentro le strade della città, / nelle piazze del mondo / Orlando, Rinaldo, Gano di Magonza. // Oboe che affili chele di granchi / fòrati al vento marino, / fai perdere il suono per i vicoli: / a coro questo canto di guerra, / a coro questo canto di pace, / a coro quest’eco alle stelle; / e quando l’alba tinge i canneti / date una parte pure a me: / legate queste braccia con un laccio, / attaccatemi lo scudo e la spada, / vestitemi con un’armatura, / datemi un cavallo fatato! // Ma la mia parte è quella di un pezzente / che tiene catene tra i polsi…// Chiudete questa porta di teatro / ora che lo spettacolo è finito. / Lasciatemi piangere / con tutti i miei pupi.

Pippo Mazza