Menzaùstu evi ‘nghiòcu i focu!
‘Ntra li crèsii di la ”Mola”
cunsàrunu missi cantàti…
Iàutu ‘nta l’àriu lìmpiu
lu suli a liùni ccuttùra li carni,
calìa l’ossa a li sireni
e capìcchi ‘rrizzàti
‘nfràscunu vavarèddi.
Lu marucchìnu
‘ssàcca li pedi nìuri a la rina
ccu ‘na brazzàta di ‘nfànfi.
Acèddu i passa strabbudùtu,
siccu allignatu,
stenni a l’urizzùnni ‘na cùtra ciuriàta
a cummigghiàri peni luntani…
‘Nmarucchìnu va, ‘nmarucchìnu veni
ccu l’urnàta uttùsa di lu mari,
e la scuma ca stìngi li frangètti
smància li raccàmmi.
Álitu di marinèdda
ca rusbìgghi cicàli a lu mirìu
ppi cunurtàri àrvuli i malària
rifrìsca la sudura a ‘sti mischìni,
spàrmici assènziu di spiranza.
E Tu, Matruzza Bedda di la Rocca
patrùna di la terra e di lu mari
sfùrnicci ‘ncucciddàtu i giggiulèna
ppi spartìllu a mmòrza ccu li figghi
ca a li sdisèrti spìcunu lu ciàtu
spurpàti di la fami.
UCCELLO DI PASSO: Ferragosto è un fuoco d’artificio! / Dentro le chiese di Castelmola / consacrano messe cantate… / Alto nel cielo limpido / il solleone ustiona le carni, / scotta le ossa alle sirene / e capezzoli arricciati / offuscano pupille. / Il marocchino / affonda i piedi neri nella sabbia / con una bracciata di cose. // Uccello di passo sperduto, / rinsecchito, / stende all’orizzonte una coperta floreata / a coprire pene lontane… / Un marocchino va, un marocchino viene / con l’ondata malinconica del mare / e la schiuma che stinge le frangette / sfalda i ricami. // Alito di vento marino / che risvegli cicale al meriggio / per confortare alberi di eucalipto / rinfresca il sudore a questi sventurati / spalmaci essenza di speranza. / E Tu, Madonna della Rocca / patrona della terra e del mare / sfornaci un pane di sesamo / per dividerlo a pezzi con i figli / che nei deserti stentano il fiato / spolpati dalla fame.
Pippo Mazza
