L’ùrtima spera di suli
stàgghia cuda di palùmmu
ca di celi luntàni
stancu tonnattòrna
a giùccu iàutu di curniciùni.
Na ‘sta gnunàta di Cattitràli
nègghia di ‘ncenzu
‘lluppìa li carni.
Orba, surda, muta
la me’ statua d’omu si scuzzòla
‘ntrapàssu d’arma.
Ammènzu li cannìli di l’artàru
ci mittissi, Madònna,
‘stu ghiòmmuru di pinsèri
cugghiùtu na li strati di lu munnu
ppi sciugghìllu ccu Tia
comu ‘nrusàriu… ma ‘sta lana,
Madònna,
evi ‘nsurbàta di làcrimi,
fa tànfu di morti:
non la ponu cardàri li To’ ita.
A ogni ugghiàta
ti sintìssi zziccàri
spini d’azzàru,
vidìssi crucifìggiri lu Fìgghiu
a ogni curma di munti!
Ora ppi ‘sta fudda strabbudùta
chiù non bàstunu rilìqui
a ‘lluminàri menti svacantàti;
semu riddùtti pèiu di l’armàli
baliànnu ‘na vita senza sensu.
E chiù ti pensu, Matri di Gesùzzu,
chiù squàgghia lu pinsèri
a ‘stu cuncèrtu d’òrganu
ca a trìzzuli mi drizza la carìna
e di lu funnu chiàma la spiranza
ppi stracangiàri novamènti l’omu.
Pippo Mazza
TRAPASSO D’ANIMA: L’ultimo raggio di sole / delinea coda di colombo / che da cieli lontani / stanco ritorna / al covile alto del cornicione. / In quest’angolo di Cattedrale / nebbia di incenso / narcotizza le carni. / Cieca, sorda, muta / la mia statua d’uomo si sgretola / in trapasso d’anima. // In mezzo alle candele dell’altare / ci metterei, Madonna, / questo gomitolo di pensieri / raccolto nelle strade del mondo / per scioglierlo con Te / come un rosario… ma questa lana, / Madonna / è inzuppata di lacrime, / fa tanfo di morte: / non la possono cardare le tue dita. / Ad ogni gugliata / ti sentiresti ficcare / spine d’acciaio, / vedresti crocifiggere il Figlio / a ogni colmo di monte! // Ora per questa folla sperduta / più non bastano reliquie / a illuminare menti svuotate; / siamo ridotti peggio degli animali / cullando una vita senza senso. / E più ti penso, Madre di Gesù (-ccio), / più strugge il pensiero / a questo concerto d’organo / che a brividi mi raddrizza la schiena / e dal fondo chiama la speranza / per ricambiare nuovamente l’uomo.
Pippo Mazza
