Purtàtimi a la stazioni, partu.
No mi facìti lu bigliettu
p’annàri e véniri, non tornu.
– Cu ci lu torci lu còddu a lu iàddu
si li puddàstri stràcqunu a la luna,
si la risata di Francisca si cunfunni
ccu lu mùrmuru spagnàtu di li figghi? –
Lassu vint’anni di peni
a la linguedda di lu marranzànu
na la vucca di ‘ndumannéri,
lassu aperta la casa
ccu la cani figghiàta
e li quatri di li me’ nannàvi
‘ppinnùti ‘rretu lu sufà.
Chianci me’ matri,
matri e figghiu chiancému
e parti macari lu me’ trenu.
‘Ntraghettu a lu scaru di Missina
ni gniùtti ccu la bucca spalancàta.
Ti lassu Sicilia
‘nta ‘ntriàngulu lìmpiu di celu
ccu ‘nocchiu di suli
ca sbuttùna zàghiri d’aranci
e strallùci midagghia d’argentu
a lu pettu iancu di Maria
comu ppi diri: “Non mi scurdàri!”
– Cu li scorda Maria, cu li scorda
ddi lenzi di mari na la ‘stati,
lu ricògghiri munuzzàgghi di luna
tra la rina ca friéva scuma
e àlighi e scunurtàti suspiri
ccu li vavareddi a l’urizzùnni
‘nta lacrimiàri di sintìna… –
Vénicci a la stazioni, partu.
No mi diri ppi unni, lu sai,
no spiàri picchì, lu sai.
Macàri tu, matri, lu sai.
Iornu e notti l’haiu ribbicàtu
cantannu ccu l’arìddi di la ”Chiana”
a lu trémmulu luntanu di li stiddi,
a pircantàri l’occhi llammicùsi,
stancu di taliàri na lu scuru
fulìnia di taràntula morta
‘mmenzamài ‘mpica na la facci,
stancu di passiàri ppi la chiazza
na li banchìni di bbàsuli ‘nfucàti,
stancu di lu cafè e quattru canti
a trantuliàri ‘nflipper ccu rràggia
p’ammazzàri centu liri di tempu
‘nta ddumma e stuta di paroli ‘ngrisi,
a iucarimi l’esistenza amara
ppi la brìscula a spati
e ‘mpasticciòttu di mennuli e meli.
– “Cu ‘mmazza u iàddu c’evi a còscia!”
E ppi ‘na còscia a tavula cunzàta
tanti voti divintai urpigghiùni
p’assicuttàri ‘nghiàddu ‘ntra puddàru. –
Ahi ahi si ‘ppesta di sudùra
na ‘stu scumpartimentu di secunna,
‘na «Emmi-Essi» ‘ddumàta
‘ccùpa la smània di lu sonnu,
ma non poi ‘ncruciàri palori.
Ahi ahi che longu ‘stu viaggiu
ca rrùmpi la schina e li rignùni.
A l’ampruvìsa vidi a to’ matri
ca chianci mancu si ssi mortu,
vidi a to’ patri tunnu ‘mpappinàtu
ca ti cunsìgghia ppi chiddu ca a fari,
vidi a to’ nannu ca chiui non capisci
e t’abbrazzàu friddu e senza sensu,
vidi la «menza-testa» ca sblènni
na lu pettu iancu di Maria…
Ora lu trenu va rilentu na lu scuru,
frisca a ‘nsimàfuru russu e si fremma.
S’appinnicùna la menti cunfunnuta.
– … che bedda «a muntagna ‘ncammìcia»,
ci mmanca na pùddira di sita!
La nivi s’accùccia a li zzappìni,
a ‘sta ura evi iancu lu viòlu
unni ti dissi palori d’amuri
ca lu ‘mmernu ogni annu
cummògghia di friddu e di iélu,
ma poi tonnattòrna lu suli
e iddi ccumpàrunu chiù lùcidi,
unitta a unitta o leggili Maria!
O squàgghia macari lu to’ cori
ca ‘mpazzùtu cerca lu miu
e no lu trova, e non si trovunu,
ma quannu passi di ddu viòlu nettu
pénsili sempri ddi palori scritti
ccu l’ardùri di la picciuttànza
e riòrditi ca ti vuleva bbeni…
‘Ncardiddìttu si sbatti ‘ntra la iàggia
non fa rignari cocciu di scagghiòla,
né stizza d’acqua, né corìna di lattuga,
non frisca, non canta, non chianci,
iò ricogghiu lu scàgghiu, la corìna,
ci iàpru la purtitta di la iàggia
non friscu, non cantu… chiànciu! –
Mi svigghiu. Calu lu finistrinu,
spùtu, addumu ‘nautra sicaretta,
lu simàfuru evi virdi, lu trenu parti.
Pippu Mazza
E PARTE ANCHE IL MIO TRENO
Portatemi alla stazione, parto. / Non mi fate il biglietto / di andata e ritorno. Non torno // – Chi torcerà il collo al gallo / se le pollastre svolazzano alla luna, / se la risata di Francesca si confonde / col mormorio spaventato dei figli? – // Lascio vent’anni di pene / alla linguetta del marranzano / nella bocca di un mendicante, / lascio aperta la casa / con la cagna figliata / e i quadri dei miei bisnonni / appesi dietro la poltrona. / Piange mia madre, / madre e figlio piangiamo / e parte anche il mio treno. // Un traghetto allo scalo di Messina / ci inghiotte col boccaporto spalancato. / Ti lascio Sicilia / in un triangolo limpido di cielo / con un raggio di sole / che sboccia zagare d’aranci / e luccica medaglia d’argento / al petto bianco di Maria / come per dire: “Non dimenticarmi!” // – Chi li dimentica Maria, chi li dimentica / quelle strisce di mare nell’estate, / il raccogliere frammenti di luna / tra la sabbia che friggeva schiuma / e alghe e sconfortati sospiri / con le pupille all’orizzonte / in un lacrimare di salsedine… // Vienici alla stazione, parto. / Non dirmi per dove, lo sai, / non chiedermi perché, lo sai. / Anche tu, madre, lo sai. / Giorno e notte l’ho replicato / cantando con i grilli della ‘Piana’ (di Catania) / al tremolio lontano delle stelle, / a socchiudere gli occhi stentati, / stanco di guardare nell’oscurità / ragnatela di tarantola morta / non sia mai appiccichi in faccia, / stanco di passeggiare per la piazza / nei marciapiedi di basole infuocate, / stanco del bar ai quattro canti / a scuotere un flipper con rabbia / per ammazzare cento lire di tempo / nell’intermittenza di parole inglesi / a giocarmi l’esistenza amara / per la briscola a spade / e un dolce di mandorle e miele. // – “Chi ammazza il gallo c’è la coscia!” / E per una coscia a tavola imbandita / tante volte diventai volpacchiotto / per inseguire un gallo nel pollaio. – // Ahi ahi si appesta di sudore / in questo scompartimento di seconda, / una «MS» accesa / soffoca la smania del sonno, / ma non puoi incrociare parole. / Ahi ahi che lungo questo viaggio / che spezza la schiena e i reni. // All’improvviso vedi tua madre / che piange nemmeno se sei morto, / vedi tuo padre del tutto impappinato / che ti consiglia per quello che devi fare, / vedi tuo nonno che più non intende / e ti ha abbracciato senza sentimento, / vedi la «mezza-medaglia» che splende / nel petto bianco di Maria… / Ora il treno rallenta nell’oscurità, / fischia ad un semaforo rosso e si ferma. / Si appisola la mente confusa. // -… che bella «l’Etna in camicia (innevata)», / le manca un papillon di seta! / la neve s’accuccia ai pini / a quest’ora è bianco il viottolo / dove ti dissi parole d’amore / che l’inverno ogni anno / copre di freddo e di gelo / ma poi ritorna il sole / ed esse compaiono più lucide, / una ad una vai a leggerle Maria! / Vai a sciogliere anche il tuo cuore / che impazzito cerca il mio / e non lo trova, e non si trovano, / ma quando passi da quel sentiero nitido / pensale sempre quelle parole scritte / con l’ardore della giovinezza / e ricordati che ti volevo bene… / Un cardellino si dibatte dentro la gabbia / non fa restare seme di scagliola, / né goccia d’acqua, né cuore di lattuga, / non fischia, non canta, non piange, / io raccolgo i semini, la lattuga, / gli apro la porticina della gabbia / non fischio, non canto…piango! – // Mi sveglio. Abbasso il finestrino, / sputo, accendo un’altra sigaretta, / il semaforo è verde, il treno parte.
Pippo Mazza
