A Muntagna scassàu!
‘ncravarcànnu urgiàti di fòcu
li satanàssi ‘llànzunu lu celu
a scòciri l’arbùri;
scugnàti di li ràdichi
cimiddiùnu ‘nsilènziu li zappìni
‘ttirrùti
a li lamènti di la terra.
Cu la cìnniri ca ‘mmàrra li canàli
simulìa rina a lu scuvèrtu,
‘nta lu ferrufilàtu
si schifìunu tutti li linzòla…
me’ matri
non c’è chiù ppi ricugghilli.
Ora ‘ntrimùrtu
sbummìca li riordi
e li trimmulìzzi
‘llàrgunu li ciàcchi di lu pettu,
si sfà lu cori
dintra la lingua ardenti di la sciàra.
SI DISFA’ IL CUORE: L’Etna è esplosa! / Accavallando rigurgiti di fuoco / i diavoli aggrediscono il cielo / a scuocere l’albore; / scostàti dalle radici / ondeggiano in silenzio i pini / atterriti / ai lamenti della terra. // Con la cenere che ostruisce le tegole / pioviggina sabbia al terrazzo, / nel fildiferro / si sporcano tutte le lenzuola… / mia madre / non c’è più per raccoglierle. // Ora un boato / riaffiora i ricordi / e i tremori / allargano gli spacchi del petto, / si disfà il cuore / dentro la lingua ardente della sciara.
Pippo Mazza
