Pantalica

Nne quant’agghìca mi sciogghi ‘a lingua,

si mi sciogghi.

Mi susu ddra vota ca mi susu

a mmatinata, ma ppi fari chi cosa?

Pantalica è ‘u postu cchiù scògnitu,

‘u cchiù strèusu, ‘u cchiù ‘nghirriùsu:

nne quant’agghìca ‘i paroli allìppunu,

pìgghiunu culuri e sapuri; ‘a rraggiuni

crisci canti canti, com’aramìgna,

comm’e rrivetti strazza ‘a carni.

A Pantalica ‘u sentimentu è lètrina,

fa pirtusi ccu l’ugni e strinci e serra,

e i muri ca s’abbrazza ‘i sdirrubba.

A Pantalica ci vaju

quannu mi sentu sgrèvitu: ci sunu valati

ca sùrunu sangu e pètiri tunni,

çicali ca cantunu tuttu l’annu, ‘i çiarùculi

mi manciunu ‘a facci.

Quannu vaju a Pantalica iù nèsciu,

a Pantalica m’arriòrdu,

a Pantalica finisci ca mi perdu.

                               Massimiliano Magnano