L’anima si sperdi

Lu mmèrnu
strallùci cuncàti di carbùni,
cuva spisìddi
ca scattiùnu ‘nfùnnu di lu cori;
ccu ‘na scàrda di ddèda, li vicini
si pròiunu trùsci di sònnira,
si scàngiunu làstimi
‘nta ‘nciuciuliàri ‘ncùttu di palori.

– Picchì torni ridennu a la to’ casa
si li gghiàvi no sfrèmmunu li porti ? –

La testa svacantàta fanìa
l’assénziu di tàrturu ‘mmuffàtu,
mògghiu e fulìnii supra di li cosi.
Intra l’ortu ‘gnilàtu di Francisca
linzòla ‘nfurciddàti sbulazzìunu
a la gghiarùra ianca di la luna.
‘Ccumpàrunu fantasmi di nannàvi
c’aìzzunu mimorii di carusu
a fari cànzu sutta ‘ncantarànu
la viggìlia di li morti.

La vuci du pisciàru ca bannìa
evi ‘ncutèddu ca sventra lu silenziu,
sangu pistàtu di palàmidu
ca nìuru stizzìa di la balànza
e quàgghia intra piatti cuppùti.
Ora l’anima si sperdi ppi li strati,
trova ‘nchiusi li crésii,
senza mònici li cummenti,
nudi li Santi di l’artàra
e pruvulàzzu diventa la me’ carni.

L’ANIMA SI SPERDE – L’inverno / luccica bracieri di carbone, / cova faville / che scoppiano nel fondo del cuore; / con una scheggia di teda, i vicini / si porgono fagotti di sogni, / si scambiano lamenti / in un mormorio insistente di parole. // – Perché torni ridendo alla tua casa / se le chiavi non aprono le porte? – / La testa svuotata sviene / all’assenzio di tartaro ammuffito, / umido e fuliggini sopra delle cose. / Dentro l’orto gelato di Francesca, / lenzuola inforcate svolazzano * / al chiarore bianco della luna. / Compaiono fantasmi di bisnonni / che eccitano memorie di bambino / a fare posto sotto un cassettone ** / la vigilia dei morti.// La voce del pescivendolo che bandisce / è un coltello che sventra il silenzio, / sangue raggrumato di palamido / che nero gocciola dalla bilancia / e coaugula dentro piatti fondi. / Ora l’anima si sperde per le strade, / trova chiuse le chiese, / senza monaci i conventi, / nudi i Santi degli altari / e polvere diventa la mia carne.
* sollevati sul filo – ** per i regali dei morti

Pippo Mazza