‘A vita è troppu ‘ranni

M’assittai  nt’a sala china-china

pinsannu di sentiri  ’na storia ’ntirissanti

ccu pirsunaggi di fatti  ’ranni

e drammi di lu cori umanu

amuri, duluri … morti …

’nveci dopo du’ uri di sburdillìu

liggiutini, musica, e chianti

m’accurgii ca non c’era nenti di sinsatu

’nta tutti ddi discursi

d’omini babbi  ca pinsaunu di campari ppi sempri;

’ u tempu ppi  iddi non havi valuri

ma ppi mia ca sacciu ca tra du ’jorna

putissi  jrimmìnni ppi sempri

’u presenti è assai prizziusu

e non pozzu  ittarlu n’a munnizza!

Mi susii accurgenumi d’essiri siddiatuna

e ci dissi chiaru-chiaru: a vita è troppu ’ranni

no aridducemula a ’na scarpa vecchia e

a ’n pugnu di … minghiunarii

Giovanna Augugliaro