”a mia stissu”
E semu ca Pippu, iò e tu
luntànu di l’unni di lu mari
ca ddu iornu lu ferrubbòttu spaccàva
a trimùrtu d’èlica e sirena.
‘Nta ribbùgghiri di scuma ciléstri
friiévunu li nostri suspiri
ccu Missina,
ca nuda si scucèva a lu suli…
E semu cca, Pippu!
E menumàli ca cci si tu
na ‘sti vòscura senza trummintìna,
na ‘sti muntagni ‘ncatinàti
a celi ùnchi di négghia,
na lu cori di la staciùni.
– Chi pena circàri di notti
na luna chintadècima e parràrici
comu quannu ssittàti ‘nta la villa
spiccicàvumu stiddi una a una
ppi bruciàri d’amuri… –
E ‘sta genti non ni po’ capìri;
non sanu di la carni ca si sciogghi
a li canzùni di li risignòla,
non sanu
ca semu cunnannàti ‘nnuccènti
a scuntàri càrzira longa
luntànu di la terra ca ni fici.
Mentri scura ccu friddu e nivicùsi
ppi non chiànciri chiù na ‘stu cuscìnu,
mi ‘ccùcciu fittu ccu tia, Pippu,
ppi truvàri ‘ntra lu pettu
‘na petra càuda di sciàra,
e codiàrini
na ‘sta siràta di vilenu.
NOSTALGIA, ”a me stesso”: E siamo qui Pippo, io e te / lontano dalle onde del mare / che quel giorno il traghetto fendeva / a sussulto d’elica e sirena. / In un ribollire di schiume azzurre / fremevano i nostri sospiri / con Messina, / che nuda si bruciava al sole… // E siamo qui, Pippo! / E menomale che ci sei tu / in questi boschi senza trementina, / in queste montagne incatenate / a cieli gonfi di nebbia, / nel cuore dell’estate. / – Che pena cercare di notte / una luna in quintadecima e parlarle / come quando seduti nella villa / staccavamo stelle una ad una / per ardere d’amore…- // E questa gente non ci può capire; / non sanno della carne che si scioglie / ai canti degli usignoli, / non sanno / che siamo condannati innocenti / a scontare carcere lungo / lontano dalla terra che ci ha fatto. // Mentre annotta con freddo e nevischi / per non piangere più su questo cuscino, / mi stringo stretto con te, Pippo, / per trovare dentro il petto / una pietra calda di lava, / e riscaldarci / in questa serata di veleno.
Pippo Mazza
